O Museo Alvarinho de Monção acolle nestes días a exposición do proxecto “Arte en Tránsito”, unha iniciativa transfronteiriza desenvolvida por estudantes da Escola Superior de Educación do Instituto Politécnico de Viana do Castelo (IPVC) e da Facultade de Belas Artes da Universidade de Vigo (FBAUV). A mostra, impulsada polo Concello de Monção co apoio das dúas institucións, naceu co obxectivo de conectar a experiencia das comunidades locais coa creatividade e coñecemento xerado no eido artístico do Norte de Portugal e Galicia.
O proceso creativo desenvolveuse en tres fases ao longo do curso. A primeira tivo lugar en outubro, coa participación de docentes e estudantes de ambas universidades. A segunda intervención realizouse en febreiro, e a última tivo lugar este mes de maio, completando así as catro obras principais do proxecto. En total, doce estudantes participaron nas distintas intervencións, achegando estilos e perspectivas diversas a esta proposta colaborativa.
A exposición está aberta ao público na Sala Terroir do Museo Alvarinho, todos os días en horario de 10:00 a 18:00 horas. “Arte en Tránsito” representa un exemplo destacado de cooperación cultural entre Galicia e o Norte de Portugal, reforzando os lazos artísticos e académicos nun espazo compartido que mestura territorio, identidade e mocidade creativa.