João Mira-Gomes, embaixador portugués en España, acudiu ao Círculo de Empresarios de Vigo para reunirse con empresarios da cidade. Alí, o representante luso mostrouse orgulloso da relación tan estreita que existe entre Galicia e Portugal; e en especial con Vigo, porta de entrada á comunidade. Lembrou que «Galicia é o terceiro cliente de Portugal e Portugal o segundo de Galicia», o que demostra a interrelación social e económica que existe entre os dous territorios.
Os proxectos estratéxicos tamén foron protagonistas na reunión. Por exemplo, Mira-Gomes considera que a conexión de Alta Velocidade dende Lisboa ata o saída sur por Vigo lograrase antes de 2030. Tamén fixo mención á industria portuaria, á economía azul e á pesca, como campos nos que Galicia e Portugal son potencias, e onde hai cada vez maior cooperación, tanto en infraestruturas como en abastecemento enerxético.
A nivel fronteirizo, valorouse positivamente os pasos que a eurorrexión está a dar para o desenvolvemento do vehículo eléctrico, con capacidade de montaxe e probas na área de Vigo, e de produción de chips no centro de nanotecnoloxía de Braga. Tamén se lembrou a necesidade de dotar de contido o acordo para os traballadores transfronteirizos, e destacouse a mellora que supuxo o acordo co Sergas para o servizo compartido do 112, así como as vantaxes que supoñería unha tarxeta sanitaria común en ambos os lados do Miño.
