Oitra ve, i van cuatru, a Escuela Oficial de Idiomas de Cáceris organiza un cursu sobri a fala galaico-portuguesa do val do Ellas, tamén coñocia cómu fala de Xalima. Os dias 17, 18 i 19 de marzu, na capital altoestreméña, hai possibilidai de aprendel un poiquininu daquela inda mui descoñocía léngua estreméña que custodian os habitantis de tres lugaris na frontéira hispano-portuguésa da Sérra de Gata: Valverdi du Frésnu, As Ellas i San Martin de Trevéllu.
É de agradecél, unha ve mais, ao coordinadol do cursu, Fortunato Castro, a sua apósta firmi por continual ofrecéndu o cursu déntru das instituciós oficiais, con a inestimabli ajua das doctoras i professoras nativas Ana Alicia Manso Flores i Tamara Flores Pérez, a quin se uni nésta ocasión a tamén nativa María Sánchez Domínguez.
Ademais dos contius gramaticais, léxicus, funcionais i literarius da lengua, se falara da redzenti propósta ortografica que foi publica fai poicus mesis en Limite. Revista de Estudios Portugueses y de la Lusofonía -se poi consultal aquí-. Se trata de un inténtu sériu por dal ferraméntas pá supervivéncia désta léngua, fala por apénas 4.500 persoas.
De oitru lau, nun formatu mais divulgativu, a menciona professora Alicia Manso estara tamén na mésma semana, o jóvis 20, no Café con Historia organizau por Guías-Historiadores de Extremadura i por a Sociedad Extremeña de Arqueología y Patrimonio en Plaséncia. Sera no Mercado Bar, situ na calli Santa Clara da ciai do Jerte, ás 19:00 horas i con entra libri hasta completal afóru.
As duas iniciativas persiguin o mésmu fin, promovél o coñociméntu désti tesóiru lingüisticu estreméñu que, ademais, guarda toa a essencia cultural da frontéira ibérica. Póicu a póicu se fai o camiñu.
*Revisión feita por Tamara Flores
Juan Rebollo Bote
Lusitaniae – Guías-Historiadores
