O próximo 26 de febreiro, «O Gran Camiño», a gran volta ciclista profesional de Galicia, dará un paso histórico coa celebración da súa primeira etapa fóra das fronteiras galegas. Esta etapa inaugural transcorrerá no Distrito do Porto, entre as localidades de Maia e Matosinhos, e renderá homenaxe aos vínculos históricos e culturais entre Galicia e Portugal, así como aos camiños portugueses a Santiago. Matosinhos, coñecido por ser o primeiro porto no que arribou o corpo do Apóstolo Santiago, será o escenario onde se coñecerá o primeiro líder desta edición, que tamén incorpora unha xornada adicional ás tradicionais catro etapas galegas.
A presentación desta etapa, celebrada na Cámara Municipal de Matosinhos, contou coa participación de destacados representantes do ciclismo, como Ezequiel Mosquera, CEO de EMESports, quen subliñou que Portugal é «a vía natural» para o crecemento da proba pola súa conexión co Camiño de Santiago e a súa tradición ciclista. O exciclista Óscar Pereiro tamén destacou a importancia de Portugal na súa carreira deportiva. Pola súa banda, Cândido Barbosa, presidente da Federação Portuguesa de Ciclismo, expresou o orgullo de acoller esta saída e eloxiou as condicións organizativas e deportivas de O Gran Camiño, aínda que lembrou os retos que afrontan as novas carreiras para obter puntos UCI.
No evento, Luís Pedro Martins, presidente de Turismo Porto e Norte, destacou o peso crecente do Camiño Portugués e o Portugués pola Costa, que son, tras o Camiño Francés, as rutas con maior afluencia de peregrinos. Ademais, Vítor Días, director rexional do IPDJ, salientou a importancia de iniciativas coma esta para estreitar os lazos entre ambos os lados da «Raia». Con esta etapa inaugural, O Gran Camiño reforza a súa proxección internacional, afianzándose como un evento clave no calendario ciclista e unha homenaxe á tradición xacobea que une Galicia e Portugal.
