O próximu sábau 22 de juñu, Juan Rebollo Bote, articulista de EL TRAPEZIO y autol de Lusitania en el horizonte: viajar y reflexionar en torno a una región rayana, estará presentandu o libru en San Martín de Trevellu (Cáceris). A presentación será as 18:00 horas en el Salón de Plenos do Axuntamentu, na Praza Maior do lugal.
Precisamenti unhu dos capítulus do libru Lusitania en el horizonte trata sobri a Serra de Gata –Sierra de Ágata, no libru-, comarca ondi se encontra o lugal de San Martín. En concretu, son dez os os textus que versan sobri a comarca, seti dos cuais falan de oitrus tantus lugaris que forman hoixi parti da Red de aldeas de Sierra de Gata, espellu das Aldeias históricas portuguesas. Será ocasión, por tantu, pa falal sobri a historia desti rincón altoextremeñu fronteirizu con Portugal y limítrofi con a provincia de Salamanca y tamén pa reflexional sobri o presenti y o futuru da cultura y do patrimoniu no ámbitu rural raianu.
Se falará, por supostu, dunhu dos tesoirus inmateriais mais preciaus de Extremaúra comu é a fala de Xálima -na cual estamus escribendu-, propia dos tres lugaris do últimu val da comarca serragatina: Valverdi du Fresnu, As Ellas y San Martín de Trevellu. É necesariu unha aposta decidía sobri a súa utilización mais alá dos ámbitus locais ondi se fala. A creación dunha comunidai de neofalantis y a promoción de actividais literarias que fomenten a escritura nesta lengua é responsabilidai de tos os agentes culturais da Raia.
Recordamus que o libru está editáu por EL TRAPEZIO y poi adquirilsi en internet na página triallibreria.eu y tamén presencialmenti en librerías de Mérida (La Selva Dentro), de Hervás (Exea) o Salamanca (Víctor Jara), así comu na propia presentación en San Martín de Trevellu.
