A Feira de Produtos Tradicionais do Eixo Atlántico leva celebrándose dende hai unha década en diferentes cidades de Galicia e do Norte de Portugal. Para esta edición, que terá lugar do 1 ao 3 de xullo, o Eixo Atlántico, o Concello de Santiago e o Concello do Barco de Valdeorras chegaron a un acordo para organizar a mostra na Alameda de Santiago de Compostela. Cun horario de apertura de 11.00 a 14.00 horas, e de 17.00 a 21.00 horas, a capital galega toma o relevo a Lugo, sede en 2021.
Neste evento estarán presentes dezasete postos, con produtos locais como queixos, aceites, doces, mel e viño (entre outros); e impartiranse dous talleres de Artesanía de Galicia para o público. Os visitantes poderán degustar e comprar produtos de alta calidade con garantía de orixe. Unha boa ocasión, como apuntan os organizadores, para apoiar a pequenos produtores galegos e portugueses, comprometidos co rural e a ecoloxía.
Algúns dos produtos que se poderán degustar son o queixo artesanal da comarca da Limia; a mel ecolóxica do Invernadoiro; o aceite de Trás-os-montes; as setas shiitake do Macizo central de Ourense; as castañas da Cabeza Grande de Manzaneda, e varias marmeladas caseiras da Coruña. Ademais, haberá produtos de pastalería, como bicas de castañas e natas portuguesas. Tamén viños (ribeiro galego e portugués de Mirandela); cervexa artesá de Compostela e licores variados de Valdeorras.
