A directora xeral de FP, Eugenia Pérez, participou na XI edición do Certame de Sumillería organizado polo CIFP Carlos Oroza de Pontevedra. Un evento que busca recoñecer os mellores sumilleres entre estudantes de 16 centros educativos de Galicia, o resto de España e Portugal. O centro forma parte da rede nacional de centros de excelencia e da rede galega de FP de Hostalaría.
O certame, agora denominado Somm Talent FP, combina formación, competición e experiencias no mundo do viño. Os participantes, dez homes e seis mulleres, realizaron catas, visitas a adegas e diferentes probas para poñer a proba as súas habilidades. Galicia estivo representada polo CIFP Carlos Oroza e outros seis centros: Fraga do Eume (Pontedeume), Compostela, Manuel Antonio (Vigo), Paseo das Pontes (A Coruña), Vilamarín (Ourense), e os institutos Sanxillao (Lugo) e de Foz. Ademais, participaron escolas de hostalaría de Asturias, Euskadi, A Rioxa, Andalucía, Canarias e Portugal.
Nesta edición, o gañador foi Héctor de la Rosa Molina, estudante do CIFP Compostela, seguido de Aitzol Otxoa Baglietto, da Escola de Hostalaría de Gamarra, en segundo lugar, e Marcos Alexander Núñez Valiño, do CIFP Carlos Oroza, en terceiro.
