Oitra vé, y van cuatru, a Escuela Oficial de Idiomas de Cáceris organiza un cursu sobri a fala galaico-portuguesa do val do Ellas, tamén coñocía comu fala de Xálima. Os días 17, 18 y 19 de marzu -é idil, a próxima semana-, na capital altoestremeña, hay posibilidai de aprendel un poiquininu daquela inda muy descoñocía lengua estremeña que custodian os habitantis de tres lugaris na fronteira hispano-portuguesa da Serra de Gata: Valverdi du Fresnu, As Ellas y San Martín de Trevellu.
É de agradecel, unha vé mais, ao coordinadol do cursu, Fortunato Castro, a súa aposta firme por continual ofrecendu o cursu dentru das institucionis oficiais, con a inestimabli axúa das doctoras y profesoras nativas Ana Alicia Manso Flores y Tamara Flores Pérez, a quenis se uni nesta ocasión a tamén nativa María Sánchez Domínguez.
Ademais dos conteníus gramaticais, léxicus, funcionais y literarius da lengua, se falará da recenti proposta ortográfica que ha síu publicá fai poicus mesis en Límite, Revista de Estudios Portugueses y de la Lusofonía -se poi consultal aquí-. Se trata de un intentu seriu por dal ferramentas pá supervivencia de esta lengua, falá por apenas 4.500 persoas.
De oitru láu, nun formatu mais divulgatíu, a mencioná profesora Alicia Manso estará tamén na misma semana, o xovis 20, en o Café con Historia organizáu por Guías-Historiadores de Extremadura y por a Sociedad Extremeña de Arqueología y Patrimonio en Plasencia. Será en o Mercado Bar, situ na calli Santa Clara da ciai do Jerte, ás 19:00 horas y con entrá libri hasta completá aforu.
As dois iniciativas persiguen o mismu fin, promovel o coñocimentu de este tesoiru lingüísticu estremeñu que, ademais, guarda toa a esencia cultural da fronteira ibérica. Poicu a poicu se fai o camiñu.
Juan Rebollo Bote
Lusitaniae – Guías-Historiadores
