Asturias atópase en pleno debate sobre a reforma do seu estatuto de autonomía. A propósito da ocasión, a Real Academia Galega (RAG) enviou un informe ao Goberno de Asturias e aos grupos parlamentarios da comunidade no que defende a declaración da oficialidade do galego en igualdade de condicións co asturiano. Segundo o comunicado da institución, esta proposta está baseada na situación lingüística do occidente de Asturias, onde se fala galego. Isto implicaría un recoñecemento similar á lingua occitana en Cataluña.
«La Real Academia Galega ansía que el Parlamento del Principado apruebe en la reforma de su Estatuto de Autonomía la declaración de oficialidad de las dos lenguas propias de Asturias, el gallego y el asturiano», expón a declaración. Tamén se sinala que «una lengua es un patrimonio cultural merecedor de ser salvaguardado, y que sería más positivo para esa salvaguarda una política de cooperación y no una política de confrontación».
Con esta nota, a RAG quere afastarse de calquera cuestión política, defendendo que do que se trata é de plasmar unha realidade cultural. A mesma situación sucede co galego en León e Zamora, así como no Norte de Portugal. A confluencia de linguas, sosteñen, é algo habitual en Europa.
Dende a Academia Galega non ven acertada a substitución do «galego-asturiano» (máis de 40.000 falantes) por «eo-naviego» na proposta de reforma estatutaria. O presidente do principado, Adrián Barbón, advertiu este martes de que ninguén lles dirá aos asturianos o que deben recoller no seu estatuto de autonomía.
