A cerámica portuguesa é moi valorada en Galicia e no resto de España. Isto explica a crecente demanda deste tipo de produtos na península ibérica. Se en abril contábamos dende EL TRAPEZIO a apertura do «outlet» de cerámica máis grande de Galicia, en xullo acábase de anunciar un novo establecemento en Almeiras, Culleredo (A Coruña). «Arte en la mesa», con 420 metros cadrados e 40.000 pezas de cerámica portuguesa, que contará, afirman os seus promotores, coas «mellores marcas de vaixelas portuguesas, mantelerías e xogos de cubertos de deseño».
A venda de excedentes de fábricas portuguesas resulta habitual. Este tipo de mercadorías adoitan ser vendidas «ao peso». Juan Pazos e Fernando Gutiérrez, que están á fronte do proxecto «Arte en la mesa», explicaron a La Voz de Galicia que teñen como socios a unha empresa da Guarda, Uro Ceramic, de onde saen os moldes para os fornos de Portugal. O seu obxectivo é ofrecerlle aos clientes pezas da máis alta calidade, polo que seguirán traballando en tecer alianzas con provedores acreditados, aseguran.
O comercio de produtos portugueses transcende a cerámica, xa que tanto o sector mobiliario como o téxtil teñen un gran protagonismo en varias das comunidades autónomas do norte e do sur de España. Este tipo de iniciativas, ademais de reforzar a relación económica de ambos os países, axuda a dar a coñecer o traballo de artesáns e produtores locais: descoñecidos, en moitos casos, ata hoxe.
