Entidades galegas e portuguesas veñen de presentar unha candidatura conxunta ao programa Interreg España–Portugal (POCTEP) co obxectivo de establecer as bases para que o río Miño transfronteirizo sexa recoñecido como Reserva da Biosfera pola UNESCO. A proposta, coordinada pola AECT Río Miño, conta coa implicación da Xunta, a Deputación de Pontevedra, a Fundación CEER, o GDR “Eu Rural”, ADRIMINHO e diversas universidades e concellos das dúas marxes do Miño, entre eles Salvaterra, Tui ou Caminha.
A candidatura ten un carácter integrador, apostando pola participación pública e privada, e baséase en anos de traballo conxunto, visitas a outras reservas e aprendizaxe compartida. A reserva abarcaría espazos de alto valor ecolóxico, integrando medidas de conservación, sensibilización e desenvolvemento sostible.
A AECT Río Miño destaca que a proposta non só pretende protexer ecosistemas únicos, senón tamén fomentar o desenvolvemento local, apostando pola educación ambiental, a implicación das comunidades e a dinamización económica sustentable. Está previsto que a candidatura se complete ao longo de 2025, cun resultado definitivo esperado para finais de outono. Esta aposta conxunta reforza o papel da Eurorrexión Galicia–Norte de Portugal como referente en gobernanza ambiental.
