A Asociación Galega de Fabricantes de Alimentos Compostos (AGAFAC) desenvolveu, fai dezaoito anos, un sistema para garantir a seguridade alimentaria dos pensos para animais. Este modelo, denominado «Galis», acaba de internacionalizarse coa incorporación da súa primeira fábrica de pensos fóra de España, en Cevargado, no distrito de Oporto, no Norte de Portugal. Un acordo asinado polo director de AGAFAC, Bruno Beade, e o director xeral da marca portuguesa, Pedro Manuel Corte-Real Alves Pereira, para incorporar a Portugal os rigurosos controis de «Galis».
Este acordo ten moita importancia, pois tamén proporcionará á empresa portuguesa acceso a toda a infraestrutura e tecnoloxía de seguridade alimentaria de Galis. As análises que realizan axudan a detectar posibles contaminacións en materias primas como millo, trigo ou soia, mediante controis en puntos críticos das diversas fábricas e empresas asociadas ao programa. Coa incorporación de Cevargado, o sistema agora abrangue 59 fábricas, 54 delas en Galicia, tres en Asturias e unha en Cantabria. Galis ten o seu laboratorio no Porto da Coruña.
Estas alianzas reforzan aínda máis a agricultura e gandeiría ibérica, sendo cada vez máis referentes en inovación tecnolóxica e científica, así como na calidade das materias primas. Un novo impulso de cooperación privada no ámbito ibérico, que segue reforzando a rede de profesionais transfronteirizos.
