O municipio de Valença do Minho foi testemuña da firma do acordo para crear o «112 Transfronteirizo». Un proxecto-piloto que permitirá que Galicia e o Norte de Portugal compartan o servizo de urxencias médicas; dando a posibilidade aos usuarios de decidir onde queren ser atendidos. Trátase do primeiro servizo de emerxencias médicas interrexional entre territorios de España e Portugal.
No acto estivo presente o Conselleiro de Sanidade da Xunta de Galicia, Julio García Comesaña, que defendeu o gran avance que esta colaboración supón; criticando a idea de que houbese que «cambiar de ambulancia na fronteira».
Tamén estiveron presentes a secretaria de Estado de Promoção da Saúde, Margarita Tavares; a secretaria de Estado do Desenvolvimento Rexional, Isabel Ferreira, e o presidente do INEM, Luís Meira; así como António Cunha, presidente da Rexión Norte de Portugal. Esta rexión lusa pronto contará coas súas propias competencias sanitarias (ata o momento centralizadas en Lisboa).
A iniciativa está integrada pola Fundación Pública de Urxencias Sanitarias de Galicia-061 e o INEM (Instituto Nacional de Emergência Médica). Con todo, a pesar de ser un acordo histórico, o colectivo de bombeiros da eurorrexión mostrouse molesto por non formar parte do mesmo, xa que argumentan que son eles os que se ocupan da maior parte das emerxencias transfronteirizas.
