A primeira edición do Trofeo Xacobeo de Piragüismo celebrarase o sábado 19 de xuño entre o río Lérez e o encoro de Verducido. Neste evento participarán 1500 deportistas, de entre 6 e 16 anos, que veñen desde todos os puntos da Península. As regatas comezarán ás 10:30 horas coa proba de categoría infantil na Ponte do Burgo, e ás 15:30 horas será o turno das categorías alevín, benxamín e prebenxamín. Finalmente, ás 16:30 horas os cadetes disputarán a súa proba no complexo deportivo David Cal. Na regata estarán, ademais de equipos galegos e portugueses, clubes de Andalucía e Asturias.
O Centro Galego de Tecnificación de Pontevedra acolleu a presentación desta competición a fin de semana pasada. A ela asistiron diferentes personalidades, como a directora xeral de Turismo, Nava Castro, os presidentes das federacións española, galega e portuguesa de piragüismo, así como os medallistas mundiais Tono Campos e Tania Álvarez, padriños do evento.
O presidente da Federación Portuguesa de Piragüismo, Víctor Félix, destacou que o piragüismo é un deporte seguro ligado coa natureza. Pola súa banda, o presidente da Federación Española, Pedro Pablo Barrios, lembrou a importancia deste tipo de iniciativas, xa que permiten desenvolver e consolidar o piragüismo na zona norte do país. O tenente alcalde de Pontevedra, Tino Fernández, reiterou o apoio da cidade ao deporte, xa que ademais de promover o compañeirismo e a vida saudable, xera unha importante actividade económica.
Por último, Nava Castro mostrouse orgullosa da unión entre Portugal e Galicia a través do Camiño portugués, axudando a internacionalizar este tipo de acontecementos, dentro do marco de promoción do Ano Santo. Tamén resaltou que o proxecto «O teu Xacobeo» está a traballar por interrelacionar deporte, mocidade e Camiño de Santiago, o cal transmite valores moi positivos, como a humildade e a inclusión.
