A Eurocidade Tui-Valença conmemora o seu 12º aniversario cun concerto especial que terá lugar o sábado, 10 de febreiro, ás 20h00, no Teatro Municipal de Tui. Un evento que contará coa participación de catro agrupacións transfronteirizas, nunha mostra da rica tradición musical compartida entre Galicia e Portugal. Un total de cen músicos do Conservatorio Profesional de Música de Tui; da Academia de Música da Fortaleza de Valença; da Asociación Musical de San Pedro da Torre, e da Banda de Música Popular de Tui uniranse para ofrecer un repertorio que inclúe algunhas das cancións máis emblemáticas dos dous territorios.
O programa do concerto está deseñado para celebrar a hermandade musical entre Galicia e Portugal, con pezas como «Balada Galega» de Juan Montes, «Reflexións de Paisaxe e Balada de Outono» de Bernardo Lima, e «Grândola, Vila Morena» de Zeca Afonso, entre outras. Esta selección de obras pretende facer un percorrido polas melodías máis coñecidas e queridas, demostrando a riqueza cultural e a profunda conexión existente entre os dous lados do río Miño.
A entrada ao concerto é gratuíta, aínda que limitada á capacidade do teatro, permitíndose un máximo de dúas entradas por persoa. As entradas poderán adquirirse unha hora antes do comezo do espectáculo, celebrando así unha década de cooperación e amizade transfronteiriza a través da música.
Entroido no Cuartel dos Bombeiros Voluntarios de Valença
Ese mesmo día, Valença convida a todos para unirse á celebración de «Valença Samba no Carnaval», no Cuartel dos Bombeiros Voluntarios. Tras o éxito da edición de 2023, a festa deste ano comezará ás 22:30 horas. A organización anima aos asistentes a vestir os seus mellores disfraces e a sumarse á diversión. Este ano, a temática xira en torno á selva «jungle», co obxectivo de converter este evento nunha das grandes referencias do carnaval no Alto Minho, cunha ampla variedade de música para todos os gustos.
O evento, que conta co apoio da Câmara Municipal de Valença, terá un carácter solidario, cunha entrada de 5 euros por persoa que se destinará aos Bombeiros Voluntarios de Valença.
