A Consellería do Medio Rural da Xunta de Galicia organizou o primeiro Congreso Internacional de Incendios Forestais «Interlumes» os días 17 e 18 de novembro. Trátase dun evento que congregou en Silleda a expertos forestais de España e Portugal, onde se levaron a cabo charlas e mesas redondas para abordar a loita contra os incendios no territorio raiano. Algunhas das cuestións que se trataron foron a planificación territorial para a prevención de grandes incendios; os lumes forestais na xestión da paisaxe ou os proxectos que se desenvolveron no marco do Interreg VAI 2014-2020 POCTEP. Acudiron representantes das administracións de Galicia, Portugal, Andalucía e Castela e León.
O conselleiro do Medio Rural, José González, tamén se referiu á posta en marcha dun plan de recuperación integral de zonas afectadas por incendios forestais cun investimento de 18 millóns de euros que, ademais, estará aberto á colaboración privada. Así mesmo, aludiu a outras partidas dos presupostos do próximo ano, como os preto de 20 millóns para melloras de infraestruturas antiincendios, os 10 millóns para o parque móbil ou os 700.000 euros para impulsar formación técnica especializada.
Proxecto «Interlumes»
O I Congreso Internacional de Incendios Forestais enmárcase dentro das accións do proxecto europeo «Interlumes». Con anterioridade, no Trapezio falamos desta iniciativa, cando publicamos a noticia da primeira base aérea ibérica para a loita contra os incendios. Un proxecto de gran relevancia, xa que permitiu reforzar a capacidade operativa de resposta na extinción de incendios forestais na fronteira de España e Portugal nos últimos anos. De feito, cada vez máis, Galicia e Portugal «unifican» equipos, técnicas e protocolos de emerxencia.