O Festival Converxencias Portugal-Galicia chega a súa 10ª edición cunha ampla programación cultural que inclúe música, teatro, danza e literatura, repartida entre o 3 de febreiro e o 9 de marzo nas localidades de Braga, Ponteareas, A Estrada, Padrón e Santiago de Compostela, co apoio da Xunta de Galicia.
O secretario xeral de Política Lingüística, Valentín García, destacou na presentación a participación do músico Amancio Prada, un dos máximos expoñentes da proxección da música e literatura galegas, tanto en España como en Portugal. O cantautor español actuará o 25 de febreiro no Teatro Circo de Braga acompañado da «Orquestra Filharmónica de Braga», o grupo portugués «Canto D´Aquí» e o «Coro do», Pais do Conservatorio Gulbenkian, nun tributo a Zeca Afonso e Rosalía de Castro.
Un mes de programación cultural
Este certame cultural programa unha serie de actividades arredor do 23 de febreiro, data de nacemento de Rosalía de Castro e de morte do cantautor portugués Zeca Afonso, estreitando os lazos que unen Galicia e Portugal e evidenciando as semellanzas entre as súas linguas e culturas. Ademais, este ano inclúe unha publicación conmemorativa do 10º aniversario. A programación reúne diferentes figuras do mundo cultural das dúas beiras do Miño (ver programación).
10 anos festexando os lazos coa lusofonía
Promovido polo grupo «Canto D´Aquí» e o Centro de Estudos Galegos da Universidade do Minho, o obxectivo deste festival é dar cumprimento á Lei 1/2014, de 24 de marzo, para o aproveitamento da lingua portuguesa e vínculos coa lusofonía, máis coñecida como «Lei Valentín Paz-Andrade». O festival celebra dez anos festexando os lazos coa lusofonía, reforzando a cooperación cultural e lingüística entre Galicia e Portugal.
